குருவைத்தேடி!

இன்றைய நவீன யுகத்தின் பல்வேறு சூழ்நிலைகளால் நிம்மதியை இழக்கும் மனிதன் வாழ்வை வெறுத்து தனது திறமை, பொருளாதாரம், பாரம்பரியத்தை மீறி ஒரு சக்தி நம்மை இயக்குகிறது என்பதை ஒரு கட்டத்தில் புரிந்துகொண்டு இறுதியாக  நிம்மதி தேடி அடைக்கலமாகும் இடம் இறைவனின் திருவடிகளே. அதிலும் ஆயிரத்தெட்டு வழிகள் உள்ளதை எண்ணி எந்தப்பக்கம் செல்வது என திகைத்து நிற்கும் வேளையில், ஆன்மீகத்தில் சிறந்த வழிகாட்டியாக ஒரு குருவை தனது அறிவுக்கு எட்டிய வகையில் அனுமானித்து அடைக்கலமாகிறான். இவர்கள் அனைவருக்கும் நிம்மதி கிடைத்துவிடுகிறதா? அல்லது தனது ஆன்மீக குருக்களால் இவர்கள் அனைவரும் பலனடைந்து விடுகிறார்களா? என்றால் பலதரப்பட்ட நபர்கள் பலதரப்பட்ட அனுபவங்களை கூறுகிறார்கள். ஏனெனில் இன்று பெயர் புகழ், தனம் அனைத்தையும் ஒருங்கே பெற  அரசியல்வாதியாக அவதாரமெடுப்பதைவிட ஆன்மீக குருவாக அவதாரமெடுப்பது சிறந்த தொழிலாகிவிட்டது. இரு தரப்புக்குமே அடிப்பொடிகள் பலமுண்டு. வடநாட்டில் ஒரு ஆன்மீக குரு தனக்காக சொந்தமாக நாணயமே அச்சடிக்கும் நிலைக்கு சென்றதை நாமறிவோம். இப்பதிவில் உண்மை குரு யார்? போலி குரு யார்? என்று நாம் ஆராயப்போவதில்லை.. மாறாக எப்படிப்பட்ட ஜாதகருக்கு எப்படிப்பட்ட குரு அமைவார் என்பதை ஆராயவுள்ளோம்.  

ஜோதிடத்தில் நம்மை ஆன்மீகத்தின்பால் ஈர்ப்பதில் மனோகாரகர் சந்திரனும், அவரது ராசியான கடகமும் முன்னிலை வகிக்கிறது. சந்திரன் நீசமாகும் விருட்சிக ராசி மறைபொருளை ஆராயும் ராசியாகும். அடுத்த நீர் ராசியான குருவின் மீன ராசி இறைவனை இயல்பாக என்ன வைக்கும் ராசியாகும். மோட்ச ராசிகளான இம்மூன்று நீர் ராசிகளே மனித மனதை இறைவனை நோக்கி திருப்ப வல்லவை. காலபுருஷனின் 4,8,12 ஆகிய இம்மூன்று ராசிகளோடு குருவின் மூலத்திரிகோண ராசியும், கால புருஷனின் 9 ஆம் பாவகமுமான  தனுசும் மனிதனை நல்ல இறை தத்துவங்களை நோக்கி வழிநடத்தும் ராசிகளாகும். அதனால்தான் தனுசு பாவம் ஆசான் பாவம், குரு பாவம் என்று அழைக்கப்படுகிறது. குருவே ஜோதிடத்தில் ஆன்மீக கிரகமாகும். ராகு-கேதுக்கள் மறைபொருளை நேரடியாக குறிப்பவை. இதில்  பரிசுத்த ஞானி கேது. கெட்டபின் ஞானி ராகு. ஒரு ஜாதகருக்கு நல்ல ஆன்மீக குரு கிடைக்க குருவும், இவ்விரு மறைபொருள் கிரகங்களும் ஜாதகத்தில் நல்ல தொடர்பில், நல்ல பாவகத்தில் இருக்க வேண்டும். இதில் கடக ராசி, அதன் அதிபதி சந்திரனின் நிலையைக்கொண்டு ஒருவரின் ஆன்மீக நோக்கம்  எந்த அளவு உண்மையானது என்பதை அறியலாம். விருட்சிக ராசி சந்திரன் நீசமாகும் ராசி என்பதால் மனம் கூறுவதை ஏற்காமல் உண்மையை ஆராய்ந்து பார்க்கும் செவ்வாயின் ராசியாகும். ஆராயாமல் ஏற்பது அரைகுறை அறிவு. ஆராய்ந்து தெளிவடைவதே உண்மை ஆன்மீகம். கால புருஷனின் 8 ஆவது பாவகமான விருட்சிகமே மறைந்திருக்கும் உண்மைகளை ஆராய்ந்து தெளியும் ராசியாகும். அதன் அதிபதி  செவ்வாயே ஆராய்ச்சி காரகர் என அழைக்கப்படுகிறார். விருச்சிகத்தில் தான் ஞான காரகர் கேது உச்சமாகிறார் என்பது குறிப்பிடத்தக்கது. சிறந்த ஆன்மீகவாதிகள் அனைவரின் ஜாதகங்களிலும் குருவும், தனுசு ராசியும் சுபத்துவம் பெற்றிப்பதை காணலாம். கால புருஷனின் 12 ஆமிடம் மீனம் ஒருவர் பெறும் அதிகபட்ச ஆன்மீகத் தெளிவை குறிக்கிறது. அதனால்தான் அது முக்தி பாவகம் என்று அழைக்கப்படுகிறது. மனிதனின் ஆன்மீகத்தேடல் முற்றுப்பெறும் பாவகம் மீனமாகும். மேற்சொன்ன கால புருஷனின் 4,8,9,12 ஆகிய பாவகங்களை லக்ன அடிப்படையிலும் எடுத்துக்கொள்ளலாம். 

கீழே ஒரு ஆணின் ஜாதகம்.

தனுசே லக்னமாக அமைந்தது ஆன்மீகத்திற்கு சிறப்பு. லக்னாதிபதி குரு  கால புருஷ 12 ஆமிடமான மீனத்தில் ஹம்ச யோகத்தில் அருமையாக அமைந்துள்ளார். சந்திரன் 8 ல் ஆட்சி இவரது மனம் இயல்பாகவே ஆன்மீகத்தை சிந்திக்கிறது. ராகு-கேதுக்கள் லக்ன தொடர்பு பெற்றது ஆன்மீகத்திற்கு சிறப்பு. லௌகீகத்திற்கு சிறப்பல்ல. சூரியன், சனி, செவ்வாய் ஆகிய 3 பாவிகளும் மறைபொருள் பாவம் 8 ன் பாவத் பாவமான 3 ல் மறைவது சிறப்பு. சுக்கிரன் உச்சம் பெற்று லக்னாதிபதியுடன் இணைந்து மாளவிய யோகத்தில் இருப்பதால் இவர் சன்யாசியல்ல. இவருக்கு திருமணமாகி மனைவி,குழந்தைகளுடன் வசிக்கிறார். பணியிலிருந்து ஓய்வு பெற்றுவிட்டார். தற்போது முழு இறைத்தேடலில் உள்ளார். ஜாதக அமைப்பு பிறவியிலேயே ஆன்மீக நாட்டத்தை ஏற்படுத்துகிறது. பணிபுரிந்து குடும்பஸ்தராக திகழ்ந்த காலத்தில்கூட இவர் வழிபாடுகள் எதையும் குறைத்துக்கொண்டதில்லை. நல்ல குருமார்கள் இவருக்கு இயல்பாகவே கிடைத்தார்கள். தற்போதும் கிடைத்துக் கொண்டிருக்கிறார்கள். நல்ல பொருளாதார வளம் மிக்கவர். ஆனால் பணத்தின்மீது பற்றுதலில்லை. தவறான குருமார்கள் இவரது வாழ்க்கை வட்டத்திற்குள் வந்துவிடாதபடி ஜாதக அமைப்பே தடுக்கிறது. மிகச் சிறந்த ஆன்மீகவாதி. நல்ல பெயரும் புகழும் உண்டு. தற்போது 5, 12  ஆமதிபதி செவ்வாயின் தசையில் கால புருஷ 12 ல் அமைந்த சுக்கிர புக்தியில் இருக்கிறார். வாகன வசதிகளுடன் பல ஸ்தலங்களுக்கு சென்று வருகிறார். இறைவழிபாட்டை தவிர வேறு சிந்தனைகள் இல்லை. சுக்கிரன் மீனத்தில் குரு தொடர்பு பெற்றதால் மனைவியும் பக்தி ஈடுபாடுள்ளவரே. 

இரண்டாவதாக மற்றொரு ஜாதகம் கீழே.

கும்ப லக்னத்தில் திக்பல குரு. இதனால் இவருக்கு ஆன்மீக நாட்டம் உண்டு. ஆனால் கும்பம் முழு பாவரான சனியின் ராசி. சிந்தனை பாவகமான ஐந்தாமிடம் மிதுனத்தில் லக்னாதிபதி சனியுடன் அவரின் பரம பகைவர் செவ்வாயுடன் இணைவு. மிதுனமும் கும்பமும் இன்ப ராசிகள். இதனால் இவரது ஆன்மீக தேடல்கள் முழுமை பெறாது. மோட்ச ராசிகளுள் முதன்மையான கடகம் 6 ஆவது ராசியாகிறது. கடகத்தின் அதிபதி சந்திரன் மோட்ச காரகர் ராகுவுடன் நீசம் பெற்ற நிலையில் விருட்சிகத்தில் இணைந்துள்ளார். மனம் எனும் சந்திரன் நீசம் பெற்ற நிலையில் தன்னுடன் இணைந்த ராகுவின் தன்மையை நீச சந்திரன் கிரகிப்பார். 10 ஆமிடம் விருட்சிகமாகி அங்கு இவ்விரு கிரக சேர்க்கை தொழிலுக்கு நல்லது. இதனால் ஜாதகர் சிங்கப்பூரில் தொழில் செய்கிறார். ஆன்மீக கிரகமான ராகு, தன்னுடன் இணைந்த நீச சந்திரனின் குற்ற மனோபாவத்தை கிரகிப்பார். இப்படி ஆன்மீக கிரகத்திற்கு நீச கிரக தொடர்பு ஏற்பட்டால் இவருக்கு கிடைக்கும் ஆன்மீக குரு குற்றமுடையவராக இருப்பார். ஆனால் அவர் வசதியானவராக இருப்பார். காரணம் 9 ஆமதிபதி சுக்கிரன் 9 க்கு 6 ல் மீனத்தில் மறைந்து உச்சம் பெறுவதால் இவர் போன்ற சீடர்களிடம் பணத்தை கறந்துவிட்டு கம்பி நீட்டிவிடுபவராக இருப்பார். இத்தகைய ஜாதக அமைப்பினர் ஆன்மீக குருக்களிடம் எச்சரிக்கையாக இருக்க வேண்டும். இல்லையேல் பொருளாதாரத்தை இழக்க நேரிடும். இங்கு சந்திரன்  நீச பங்கமடைந்திருந்தால் ஜாதகருக்கு பொருளாதா ஏமாற்றத்திற்கு பிறகு மீண்டுமொரு நல்ல குரு கிடைப்பார். ஆனால் சந்திரன் இங்கு நீச பங்கமடையவில்லை. இரண்டில் உச்சமான சுக்கிர தசை இவருக்கு வசதியான வெளிநாட்டு வாய்ப்புகளை கொடுத்துக்கொண்டுள்ளது. இவரது பொருளாதார நிலமையை புரிந்துகொண்ட இவரது குரு இவரிடமிருந்து பல லட்சங்களை   சுருட்டிக்கொண்டு வெளிநாட்டிற்கு ஓடிவிட்டார். இதனால் இவருக்கு கடும் மன உளைச்சல். இவரது ஜாதகத்தை ஆய்வு செய்தபோது கோட்சார சந்திரன் விருட்சிகத்தில் சென்றுகொண்டிருந்தது. இவர் இன்னமும் நல்ல குருவிற்காக ஏங்கிக்கொண்டுள்ளார். 

நல்ல குரு கிடைப்பதற்கான ஜாதக அமைப்பு.

நல்ல குரு கிடைக்க ஜாதகத்தில் ஆன்மீக கிரகங்களான ராகு-கேதுக்களுக்கு குரு தொடர்பும், 9 ஆமதிபதி தொடர்பும் இருப்பது அவசியம். குரு தொடர்பு பெற்ற ராகுவிற்கு அமிர்த ராகு என்றே ஜோதிடத்தில் ஒரு பெயருண்டு. 

தனுசும் குருவும்,  ஒன்பதாம் பாவகமும்  அதன் அதிபதியும்  பாதிக்கப்பட்ட நிலையில் இவ்விரு கிரகங்களின்  தொடர்பற்ற  நிலையில், நீச மற்றும் பாவ கிரகங்களின் தொடர்பு ராகு-கேதுக்களுக்கு ஏற்பட்டால் ஜாதகருக்கு கிடைக்கும் குரு பயனற்றவராக, பாதிப்பை தருபவராக இருப்பார். 

நல்ல ஆன்மீக குரு எளிமையானவர். தனது சீடர்களை ஒருபோதும் கைவிட மாட்டார். ஏமாற்றமாட்டார். பணத்தாசை பிடித்தவராக இருக்க மாட்டார். நல்ல குரு கிடைக்கவும் ஒரு ஜாதக அமைப்பு தேவை என்பதோடு நமக்கும்  எச்சரிக்கை மிக்க ஒரு தெளிவும் பொறுமையான தேடலும் வேண்டும்.   

மீண்டுமொரு பதிவில் விரைவில் சந்திப்போம்,

அதுவரை வாழ்த்துக்களுடன்,

ஜோதிஷ ஆச்சார்யா பழனியப்பன். 

கைபேசி: 8300124501.