உறவுகளும் கர்ம வினைகளும்!

மனித உறவுகள் எப்போதுமே தற்செயலாக அமைவதில்லை. ஒவ்வொரு உறவும், நட்பும், தொடர்பும் காரண காரியமின்றி நம் வாழ்வோடு இணைக்கப்படுவதில்லை. அவை நமது  முற்பிறவி மற்றும் நடப்புப் பிறவிக் கர்ம வினைகளின் அடிப்படையில்தான் நம்மோடு தொடர்பு கொள்கின்றன. அந்த வினை முடிந்ததும் அவர்கள் நம்மைவிட்டு விலகிச் செல்கிறார்கள் அல்லது நாமே அவர்களைவிட்டு விலகுகிறோம்.

இந்தத் பிரிவுகளும் இணைப்புகளும் காரண காரியங்களின்றி நடப்பதில்லை. சில பிரிவுகள் நமக்குக் கடுமையான வலியைத் தந்தாலும், சில பிரிவுகள் வாழ்வின் அடுத்த கட்ட நகர்வுக்குத் தேவையான நிம்மதியைத் தருகின்றன. ஒருவரின் வாழ்க்கையில் யார் தங்குவார்கள், யார் விலகுவார்கள் என்பதைத் துல்லியமாக நிர்ணயிப்பது பிரபஞ்சத்தின் கர்மக் கணக்குதான்.

இந்த உண்மையை ஒரு துல்லியமான உதாரண ஜாதகத்தின் மூலம் மிக ஆழமாகப் புரிந்துகொள்வதே இந்தப் பதிவின் நோக்கமாகும். இதற்கு நாம் தனுசு லக்னத்தில் பிறந்த ஒரு மத்திய வயது ஆணின் ஜாதகத்தை ஆராய உள்ளோம்.

கிரக அமைப்புகளும் சூட்சுமமும்:

• செவ்வாய் (5-ஆம் அதிபதி): தனுசு லக்னத்திற்கு 5-ஆம் அதிபதியான செவ்வாய், 4-ஆம் வீடான மீனத்தில் சனியின் உத்திரட்டாதி நட்சத்திரத்தில் அமர்ந்துள்ளார்.
• புதன் (பாதகாதிபதி & 7-ஆம் அதிபதி): தனுசு லக்னத்திற்குப் பாதகாதிபதியாகவும், களத்திரப் பாவாதிபதியாகவும், இளைய சகோதரியைக் குறிப்பவருமான புதன், கன்னியில் உச்சம் பெற்றுள்ளார்.
• நீச பங்க ராஜயோகம்: உச்சம் பெற்ற புதனுடன், நீசம் பெற்ற சுக்கிரன் இணைந்துள்ளார். இதன் விளைவாக புதனால் சுக்கிரனுக்கு நீச பங்கம் ஏற்படுகிறது.

உறவுச் சிக்கல்களும் விதியும்:

புதன் சுக்கிர அமைப்பின்படி, ஜாதகருக்குத் தங்கை அல்லது மனைவி இருவரில் ஒருவரின் தொடர்பு மட்டுமே முழுமையாக இருக்கும் என்ற நிலை உருவாகிறது.

• தங்கைக்கு முக்கியத்துவம் கொடுத்தால் மனைவியை இழக்க நேரிடும்; மனைவிக்கு முக்கியத்துவம் கொடுத்தால் தங்கை விலகிவிடுவார்.
• காதல் திருமணம் செய்த இந்த ஜாதகர், திருமணமாகி முதல் மூன்று ஆண்டுகள் தங்கையுடன் பேசாமல் இருந்தபோது, மனைவியுடன் நல்ல இல்லற வாழ்வை அனுபவித்தார்.

புத்திர தோஷமும் கிரகப் பார்வையும்:

கன்னி புதன், தனது நீச வீடான மீனத்தில் நிற்கும் புத்திர ஸ்தானாதிபதி செவ்வாயை அவரது சித்திரை நட்சத்திரத்திலிருந்து நேர் பார்வை பார்க்கிறார். அதே சமயம் கன்னி சுக்கிரன் தனது உச்ச வீடான மீனச் செவ்வாயை பார்க்கிறார். கன்னி ராசி புதன்-சுக்கிர நிலைக்கு எதிர்மாறானது இந்நிலை.

• தங்கைக்கு அதிக முக்கியத்துவம் கொடுத்தால், ஜாதகருக்கு மனைவியுடனான இல்லற உறவு பாதிக்கப்பட்டு, அதன் மூலம் புத்திரப்பேறும் தாமதமாகும் என்பதை இது குறிக்கிறது.
• புத்திர காரகரான குரு வக்கிரப் பெற்றிருப்பது இந்த நிலையை மேலும் உறுதிப்படுத்தியது. மேலும், 4-ஆம் வீட்டில் மாந்தியுடன் செவ்வாய் இணைந்து நிற்பதால், ஜாதகரின் வீட்டிற்கு அருகில் சுடுகாடு உள்ளது.

ராகுவின் ஆதிக்கம் மற்றும் கர்மாவின் வெளிப்பாடு:

ஜாதகத்தில் இளைய சகோதரத்தைக் குறிக்கும் 3-ஆம் பாவாதிபதி சனி லக்னத்தில் நிற்கிறார். 3-ஆம் வீட்டில் சர்ப்பக் கிரகமான ராகு சதய நட்சத்திரத்தில் நிற்கிறார்.

• 3-ஆம் அதிபதி சனி தசை நடந்த காலத்தில், தங்கை வீட்டிற்கு வந்த இரண்டு நாட்களில் வீட்டிற்கு பாம்பு வந்ததை ஜாதகர் குறிப்பிட்டார். மனைவியுடனான உறவிலும் விரிசல் விழுந்தது.
• தன் முன்னோர்கள் கூறிய சகுன, நிமித்த அறிவுரையை நினைவுகூர்ந்த ஜாதகர், அதன் பிறகு  தங்கையுடனான உறவை மிக அளவோடு வைத்துக்கொள்ளத் தொடங்கினார்.

கர்மாவின் தீர்வு மற்றும் மகப்பேறு:

தங்கையுடனான தொடர்பை அளவாக வைத்துக்கொண்ட பிறகு, நிலைமை மாறியது. மனைவி கருத்தரித்து அழகான பெண் குழந்தை பிறந்தது.

• மூத்த மகளைக் குறிக்கும் காரக கிரகம் சுக்கிரன் என்பதால், புதனுடன் இணைந்த நீச சுக்கிரன் வலுப்பெற்றார்.
• சுக்கிரனின் நீச குணம் புதனுக்குச் செல்வதால், சுக்கிரனின் அம்சமான மனைவியும் மகளும் சிறப்புற வாழ, புதனின் அம்சமான தங்கை விலகுகிறார்.
• மகள் பிறந்ததும் தங்கையுடனான உறவு முற்றிலுமாகத் துண்டிக்கப்பட்டுவிட்டது. ஆண் தன்மையைக் குறிக்கும் செவ்வாயை அலிகிரகமான புதன் பார்ப்பதால் ஆண் குறைபாடு இருந்த நிலையில், புதனின் காரக உறவான தங்கை விலகியதும் ஜாதகருக்கு ஆண் தன்மை அதிகரித்து மகள் பிறந்தார் என்பதும் இங்கு கவனிக்கத்தக்கது.

ஜோதிடம் என்பது வெறும் எதிர்காலத்தைக் கணிக்கும் கருவி மட்டுமல்ல; அது பிரபஞ்சம் மனிதர்களுக்குக் கற்றுக்கொடுக்கும் வாழ்க்கைத் தத்துவம். இந்த உதாரண ஜாதகம் நமக்கு உணர்த்தும் பாடம் மிகவும் ஆழமானது. வாழ்வில் சில உறவுகள் நம்மைக் கடந்து செல்வதோ அல்லது விலகுவதோ நம்முடைய கர்மக் கணக்குகளைச் சமன் செய்வதற்காகவே அமைகிறது. எல்லா உறவுகளையும் ஒரே நேரத்தில் நம்முடன் தக்கவைத்துக் கொள்ள முடியாது என்பதைப் புரிந்துகொள்ளும்போது, வாழ்வில் ஏற்படும் பிரிவுகளுக்கான காரணமும் அதன் வலியும் குறைந்துவிடும்.

இயற்கையின் நியதிக்கும் பிரபஞ்சத்தின் கர்மக் கணக்கிற்கும் தலைவணங்கி, நம் வாழ்வின் முன்னுரிமைகளைச் சரியாக நிர்ணயிக்கும்போதே இல்லறமும் வாழ்க்கையும் இனிமையாக மாறுகிறது.

மீண்டும் விரைவில் உங்களை மற்றுமொரு பதிவில் சந்திக்கிறேன்.

அதுவரை வாழ்த்துக்களுடன்,

ஜோதிஷ ஆச்சார்யா பழனியப்பன்.

கைபேசி: +91 8300124501