இன்று பள்ளிகளும் கல்லூரிகளும் பாடங்களை மனப்பாடம் செய்து ஒப்புவிப்பதிலேயே கவனம் செலுத்துகின்றனர். அரசுக் கல்வி நிறுவனங்கள் மட்டுமல்ல, என்னிடம் தனது கல்லூரி அனுபவங்களை பகிர்ந்துகொண்ட புகழ் பெற்ற சென்னை தனியார் பொறியியல் கல்லூரி விரிவுரையாளர் ஒருவர், IIT போன்ற புகழ் பெற்ற அமைப்புகளை தவிர ஏனைய 95 சதவீதம் பள்ளி, கல்லூரி அமைப்புகள் இன்று இப்படித்தான் இருக்கின்றன என்று வருத்தப்பட்டார். இத்தகைய பள்ளி கல்லூரிகளில் படித்து வெளிவருவோர், நாளைய செயற்கை நுண்ணறிவின் அடிமைகளாக பணிபுரிவது உறுதி. நுன்பொறிகளுக்கு செயற்கை நுண்ணறிவை புகட்டுபவர்களாக இவர்கள் இருக்க வாய்ப்பில்லை என்று அங்கலாய்த்தார்.
இந்நிலையில் நண்பர் ஒருவர் நன்கு படித்து முதல் மதிப்பெண் பெறும் தனது மகன் தற்போது சரியாக படிப்பதில்லை. பள்ளியிலிருந்து வந்ததும் மன நிலை பாதிக்கப்பட்டவனாக அறையில் முடங்கிவிடுகிறான். இவனது ஒன்றுவிட்ட அண்ணன் கல்லூரியில் இளங்கலையில் தங்கப்பதக்கம் பெற்றவன். அவனைப்போல இவனுக்கும் நல்ல எதிர்காலம் அமையும் என்ற கனவில் நல்ல தனியார் பள்ளியில் பல ஆயிரம் செலவு செய்து படிக்க வைக்கும் எனக்கு, இவனது திடீர் மாற்றம் மன உழைச்சலை தருகிறது. நன்கு படிக்கும் இவனது மாற்றத்திற்கு கிரக ரீதியான காரணமா? அல்லது நட்பு சரியில்லையா? என்று கூறுங்கள் என்று என்னிடம் மகனது ஜாதகத்துடன் வந்தார். இன்றைய ஒவ்வொரு மனிதனும் தனித்தன்மை மிக்கவனே. குறிப்பாக குழந்தைகளை பிறருடன் ஒப்பிடக்கூடாது. அவர்களது தனித்தன்மையை அறிந்து அதில் கவனம் செலுத்தச் செய்தால் அதில் சாதனையாளர்களாக வர வாய்ப்புண்டு என்று சமாதானம் கூறினாலும் வந்த நண்பர் அதை ஏற்கவில்லை.
கீழே நண்பரின் மகனது ஜாதகம்.
ஜாதகத்தில் 1௦ ஆம் வகுப்பு வரையிலான அடிப்படைக் கல்வியை வித்யா ஸ்தானம் எனப்படும் 4 ஆமிடம் குறிப்பிடும். அதற்கு மேற்பட்டு தேர்வு செய்து படிக்கும் இளங்கலை வரையிலான கல்வியை 5 ஆமிடம் குறிப்பிடும். முதுகலைக் கல்வியை 9 ஆமிடம் குறிப்பிடும். இந்த மாணவன் 11 ஆம் வகுப்பில் கணினிக் கல்வியை தேர்வு செய்து படிக்கிறான். இதனால் ஜாதகனுக்கு கல்வியில் 5 ஆமிடம் செயல்படுகிறது. தற்போது சனி தசை சந்திர புக்தியில் இருக்கிறான். புக்திநாதர் சந்திரன் ஆசிரியரை குறிப்பிடும் 9 ஆமிடம் விருட்சிகத்தில் ஜாதகம் பார்த்த நாளின் கோட்சாரத்தில் நீசமாகியுள்ளார். 9 ஆமதிபதி செவ்வாய் கோட்சாரத்தில் 9 க்கு விரையத்தில் துலாத்தில் லக்னத்திற்கு 8 ல் மறைந்துள்ளார். கால புருஷ 9 ஆமதிபதி குரு கோட்சாரத்தில் ஜனன கேதுவுடன் கடகத்தில் இணைந்ததால் கெட்டுள்ளார். இவை இந்த மாணவன் ஆசிரியரால் பாதிக்கப்படுவதை குறிப்பிடுகிறது. இவனது ஆசிரியர் பாடங்களை கற்பிக்காமல் மனனம் செய்யச் சொல்வதையும் இவ்வமைப்பு குறிப்பிடுகிறது.
அடிப்படையை புரிந்துகொள்ளாமல் பாடங்களை மனனம் செய்யச் சொல்வதை ஆட்சி பெற்ற ஜாதகச் சந்திரன் ஏற்காது. ஆனால் தற்காலத்தில் தனியார் பள்ளிகளில் 11 ஆம் வகுப்பு பாடத்தை நடத்துவதே அரிது. அதை மனனம் செய்துவிட்டு அடுத்த ஆண்டு பொதுத் தேர்வுக்கான 12 ஆம் வகுப்பு பாடங்களை முறையாக நடத்துகின்றனர் இவனது ஆசிரியர்கள். 11 ஆம் வகுப்பில் 12 ஆம் வகுப்பிற்கான அடிப்படை உள்ளதால், அடிப்படை புரியாமல் 12 ஆம் வகுப்பிற்கான கணினிக் கல்வியை முழுமையாக ஏற்க இயலாது தவிக்கிறான் மாணவன். இதுவே இவனது மனச் சோர்விற்கு காரணம். ஜாதகம் சுட்டிக்காட்டும் இவ்வுண்மைகளை கூறியதும் மகனிடம் கேட்டு இவற்றை தந்தை உறுதிபடுத்தினார். யாரிடம் கூறுவது எனது தெரியாது புலம்பும் தனது மகனின் நிலையை எண்ணி கண்ணீர் சிந்தினார் நண்பர். காலக் கொடுமை. பல ஆயிரங்கள் கட்டி பள்ளியில் சேர்க்கும் மாணவர்களுக்கு முறையான கல்வி மறுக்கப்படுவது மாபெரும் துரோகம். இதனால் ஏற்படும் மனச் சோர்வால் பல மாணவர்கள் தற்கொலை எண்ணங்களுக்கும் ஆளாகிறார்கள் என்பதும் உண்மை. பள்ளியிடம் பேசுங்கள். தேவைப்படின் 11 ஆம் வகுப்பு கணினிக் கல்வியை கற்பிக்க Tution வைக்கலாம் என்று ஆலோசனை கூறினேன்.
கீழே ஒரு பெண்ணின் ஜாதகம்.
வித்யா காரகர் எனப்படும் புதன் உச்சமாகும் கன்னியே இந்த ஜாதகிக்கு லக்னமாக அமைந்தது சிறப்பு. வித்யா ஸ்தானமான 4 ஆமிடம் தனுசில் உயர் கல்வியை குறிப்பிடும் 9 ஆமதிபதி சுக்கிரன் திக்பலம் பெற்று அமைந்துள்ளது மிகச் சிறப்பு. இளங்கலை பட்டத்தை குறிப்பிடும் 5 ஆமதிபதி சனி தனது மூலத் திரிகோண வீட்டில் லாபாதிபதியான வளர் பிறை சந்திரனுடன் இணைந்துள்ளதும் சிறப்பான அமைவு. இவை இந்த ஜாதகிக்கு சாதகமான தசா-புக்திகள் நடந்தால் கல்வியில் சாதனை படைப்பதை குறிப்பிடுகிறது. ஜாதகிக்கு 3 ஆமிடமான விருட்சிகத்திலமைந்த குரு தசைதான் நடக்கிறது. பரம சுபர் குருவிற்கு 3 ஆமிடம் மறைவு என்றாலும் அவர் நான்கிலமைந்த செவ்வாயுடன் பரிவரத்தனையாவதால் மறைவு ஸ்தான தோஷம் நீங்கிவிடுகிறது. களத்திர பாவாதிபதியான குரு கணவனை குறிப்பிடும் செவ்வாயுடன் பரிவர்த்தனையாவதால் இந்த ஜாதகத்தில் கணவன் எனும் உறவு வந்தபிறகுதான் பரிவர்த்தனை செயல்படும் என்பதை அறிக. இதன்படி பரிவர்த்தனைக்கு முன் குரு இளங்கலையை குறிப்பிடும் 5 ஆமிடமான மகரத்திற்கு லாப ஸ்தானமான விருட்சிகத்தில் இருந்து தசை நடத்துகிறார். இதனால் ஜாதகிக்கு இளங்கலையில் சிறப்புகள் ஏற்படும். குரு முதுகலைக் கல்வியை குறிப்பிடும் 9 ஆமிடத்தை பார்க்கிறார். இதனால் ஜாதகிக்கு முதுகலையிலும் சிறப்புகள் ஏற்படும். குரு 7 ஆமிடமான மீனத்தை பார்ப்பதால் ஜாதகிக்கு நடப்பு குரு தசையிலேயே கௌரவமான நிலையில் திருமணமும் நடந்தேறிவிடும்.
கல்வி சிறப்புகளுக்காண சதுர்விம்சாம்ச சக்கரத்தை (D24) ஆராய்ந்தால் இந்தச் ஜாதகி கல்வியில் பெரும் சிறப்புகளை துல்லியமான கூறிவிட இயலும். சதுர் விம்சாம்சத்தில் இளங்கலைக் கல்வியை குறிப்பிடும் 5 ஆமிடம் மேஷத்தில் முதுகலைக் கல்வியை குறிப்பிடும் சூரியன் உச்சம் பெற்று அமைந்துள்ளார். இதனால் ஜாதகி இளங்கலையிலும், முதுகலையிலும் மிகப் பெரும் சாதனையுடன் தேறி அதனால் கௌரவமும் புகழும் பெறுவார் என்பது தெரிகிறது. தங்கத்தை குறிப்பிடும் குரு தசை நடக்கையில் 5, 9 ஆமிடங்கள் உச்ச கிரக தொடர்பில் அமைந்ததால் இந்தச் ஜாதகி இளங்கலையிலும் முதுகலையிலும் சாதனை மதிப்பெண்களில் தேர்ச்சி பெற்று இரு தங்கப் பதக்கங்களை பெற்றார். தனுசு லக்னத்தை எந்த கிரகமும் பார்க்கவில்லை. ஆனால் சந்திரனது 5 ஆமிடத்தில் சனி பார்வை பெற்ற தசா நாதர் குரு அமைந்ததால் குரு தசையில், சனி புக்தியில் ஜாதகி இளங்கலைக் கல்வியை முடித்தார். ராசிக்கு 9 ஆமதிபதி புதன் கடகத்திலிருந்து ராசியை பார்ப்பதால், குரு தசையில் புதன் புக்தியில் ஜாதகி முதுகலைக் கல்வியை முடித்தார்.
ஜாதக அமைப்பு மட்டுமல்ல, கல்வி கற்கும் காலத்தில் உரிய தசா-புக்திகள் தொடர்பானால் மட்டுமே ஒருவர் கல்வியில் தங்கப்பதக்கம் பெற இயலும். இதை பல ஜாதகங்களில் கண்டிருக்கிறேன்.
மேற்கண்ட விபரங்களை நண்பரிடம் எடுத்துக்கூறி உங்கள் மகனுக்கு பள்ளியில் உள்ள பிரச்சனைகளை சரி செய்யுங்கள். அனைவரும் முதல் மதிப்பெண்ணும், கல்வியில் தங்கப்பதக்கமும் பெற முயல்வது இயல்புதான். ஆனால் கொடுப்பினை இருப்பவர்களுக்கே அந்த வாய்ப்பு கிடைக்கும். பாடசாலைக் கல்வி வாழ்வின் ஒரு அங்கம்தான். வாழ்வில் அனுபவக் கல்வியே ஒருவரை சிறப்பாக வாழ வைக்கும் என்று எடுத்துரைத்தேன். புரிந்துகொண்ட நண்பர் நன்றி கூறி விடை பெற்றார்.
மற்றுமொரு பதிவில் உங்களை விரைவில் சந்திக்கிறேன்.
அதுவரை வாழ்த்துக்களுடன்,
ஜோதிஷ ஆச்சார்யா பழனியப்பன்,
கைபேசி: +91 8300124501
