வெற்றிகரமான தொழில் முனைவோராக இருப்பது இன்று சாதனையானது. அதிலும் பல துறைகளிலும் ஈடுபட்டு சாதிப்பது அனைவருக்கும் வாய்க்காது. ஆனால் விடா முயற்சியும் ஆர்வமும் இருந்தால் எந்த வாய்ப்புகளையும் ஒரு கை பார்க்கலாம். பலர் குறிக்கோள் சிதைவடையும் என்று ஒரே முகமாக தங்கள் தொழில்களை கொண்டுசெலுத்துகிறார்கள். இதை தவறு என்று கூறிவிட முடியாது என்றாலும் ஒரே வகை தொழில்கள் எப்பொழுதும் நமக்கு லாபகரமாக இருக்கும் என்று கூறிவிட இயலாது. தொழில்கள் கால மாற்றத்திற்கேற்ற மாறுதலை சந்திக்காவிட்டால் பாதிக்கப்படுவது இயல்பு. ஒரு தொழிலில் பாதிப்பு வந்தால் மற்றொரு தொழில் லாபகரமாக இருக்கும் என்பதுதான் ஒரே சமயத்தில் பல்வேறு தொழில்களில் ஈடுபடுகிறவர்களின் கருத்தாக இருக்கிறது. ஒருவரது ஈடுபாடு, திறமை இவற்றை மீறி சில தொழில்களில் வேறு வழியில்லாமல் நாம் ஈடுபட்டிருப்போம். அப்படியானால் தொழில் ரீதியாக எது நம்மை இயக்குகிறது என்பதை எப்படி தெரிந்துகொள்வது? இதற்கு ஜாதகம்தான் உதவிக்கு வருகிறது. நம்மை நோக்கி வரும் பல தொழில் வாய்ப்புகளில், எது நமக்கு பலனளிக்கும் என்பதை எப்படி தெரிந்துகொள்வது என்பதை ஆராய்வதே இன்றைய பதிவின் நோக்கம்.
தொழிலில் ஒருவர் ஈடுபடும் காலத்தில் நடக்கும் தசா கிரகம் பல கிரகங்களுடன் தொடர்பில் இருந்தால் மட்டுமே ஒருவர் ஒன்றுக்கும் மேற்பட்ட தொழிலில் ஈடுபட இயலும். அப்படியான பல தொழில்களில் வலுவான அமைப்புடன் லக்னம், லக்னாதிபதியுடன் தொடர்புடைய கிரக காரக தொழில் மட்டுமே ஜாதகருக்கு நிலைக்கும்.
கீழே ஒரு பெண்ணின் ஜாதகம்.
நடுத்தர வயதுடைய பெண்ணின் ஜாதகம் இது. கும்ப லக்ன ஜாதகம். லக்னாதிபதி சனி தொழில் பாவகமான 1௦ ஆமிடத்தின் பாவத் பாவகமான 7 ஆமிடத்தில் சூரியனின் வீட்டில் இருந்து லக்னத்தை பார்ப்பதால் சுயதொழில் செய்யும் எண்ணம் இயல்பாக ஜாதகிக்கு இருக்கும். அதுவும் லக்னாதிபதி சனி பல கிரகங்களுடன் இணைந்து லக்னத்தை பார்ப்பதால் பல தொழில்களில் ஈடுபடவும் வாய்ப்பு உண்டு என்பது தெரிகிறது. சூரியன் புதனுடன் இணைந்து 1௦ ஆமிடத்தை பார்ப்பது தொழிலில் தனித்து செயல்படுபவர் என்பதை குறிக்கிறது. லக்ன கேது பலரை இணைத்துக்கொண்டு ஒரு அமைப்பை ஏற்படுத்திக்கொண்டு தொழில் செய்வதை குறிப்பிடும். இதனால் ஜாதகி பல தொழில்களில் ஈடுபட்டாலும் யாரையும் தனது தொழிலில் கூட்டு சேர்க்க மாட்டார். இணைந்து செயல்படுவது மட்டுமே இருக்கும்.
1௦ ஆமிடமான விருட்சிகத்தை அதன் அதிபதியும் பூமி காரகருமான செவ்வாயும், 4 ஆமிடத்திலிருந்து சூரியனும் புதனும் பார்ப்பதால் ஜாதகிக்கு நிலம், சொத்து வாங்கி விற்பதில் ஆர்வம் இருக்கும் என்று கணிக்கலாம். புதன் நில விற்பனையை குறிப்பிட்டாலும் கமிஷன், தரகு ஆகியவற்றையும் குறிப்பிடும் என்பதால் இவருக்கு நித்தரகராக செயல்படும் அமைப்பு உள்ளது. நான்காமிடமும் செவ்வாயும் வண்டி வாகனங்களையும் குறிப்பிடும் என்பதால் ஜாதகி வாகனத் துறையிலும் ஈடுபட வாய்ப்புண்டு.
ஒருவருக்கு வருமானம் வரும் அமைப்பை 2 ஆமிடமும் அதன் திரிகோணங்களாகிய 6, 1௦ ஆகியவையும் குறிப்பிடும். அதன்படி பார்ப்பின் 2 ஆமிடத்தை செவ்வாய் 8 ஆம் பார்வையாக பார்க்கிறார். ஏற்கனவே செவ்வாயின் காரக தொழிலையும் 1௦ ஆமிடத்தை பார்க்கும் செவ்வாய், புதன், சூரியன் தொழில்களையும் பார்த்துவிட்டோம், 6 ஆமிடதுடன் எந்த கிரகமும் தொடர்புகொள்ளவில்லை என்றாலும் 6 ஆமதிபதியான சந்திரனின் நிலையை கவனிப்போம். 5 ல் அமைந்த சந்திரன் லக்னத்திற்கு நெருங்கிய பாகையில் உள்ளதால் சந்திரனின் காரக தொழில் ஜாதகரை அதிகம் ஈர்க்கும். சுக்கிரனுடன் பரிவர்த்தனைக்குப் பிறகு புதன் வந்து சந்திரனுடன் இணைவதால் ஜாதகி சந்திரனின் காரக தொழிலை செய்தால் அதில் புதனின் காரகங்களான கமிஷன், தரகு போன்றவை இருக்கலாம். லக்னத்துடன் ராகு-கேதுக்கள் தொடர்பாவதால் ஜாதகி மருத்துவம், மின்னணு மென்பொருள் போன்ற துறையிலும் ஈடுபட வாய்ப்புண்டு.
மேற்சொன்னவற்றில் ஜாதகி எந்த தொழில் செய்வார் என்பதை தசா-புக்தி கிரகங்களே நிர்ணயிக்கும். மேலும் இதை தெளிவாக தொழிலுக்கான வர்க்கச் சக்கரமான தசாம்சம் தெளிவாக சுட்டிக்காட்டும்.
தசாம்சத்தில் கடக லக்னாதிபதி சந்திரன் 5, 1௦ அதிபதியும் லக்ன யோகாதிபதியுமான செவ்வாயுடன் விருட்சிகத்தில் நீச பங்கப்பட்டுள்ளார். இதனால் ஜாதகி சந்திரன், செவ்வாய் ஆகியவற்றின் காரக தொழிலை செய்தால் சிறப்படைவார் எனலாம். 2 ல் சுக்கிரன், ராகு சேர்க்கையை சூரியன் பார்ப்பதால் ஜாதகி நவீன மின்னணுப் பொறியியல் , மென்பொருள்கள் ஆகியவற்றுடன் தொடர்பாகவும் வாய்ப்பு வரும். 1௦ ஆமிடமான மேஷத்தில் அமைந்த சனி வக்கிரம் பெற்றதால் நீச பங்கப்படுவதோடு, குரு பார்வையையும் பெற்று சிறப்படைந்துள்ளார். வக்கிர சனி ஜாதகி எந்தத் தொழில் செய்தாலும் அதில் பிடிவாதமான தொழில் அறிவை தருவார். சுக ஸ்தானமான 4 குரு நின்று 1௦ ஆமிட சனியை பார்ப்பதால் ஜாதகி எந்தத் தொழில் செய்தாலும் அதிகமாக சிரமப்படாமல் பார்த்துக்கொள்வார். தசாம்ச லக்னமே கால புருஷ 4 ஆமிடமாக அமைந்து, லக்னாதிபதி சந்திரன் பூமி காரகர் செவ்வாய் தொடர்பு பெறுவதால் ஜாதகி நிலம், வீடு விற்பனையில் ஈடுபடுவார். வாகன காரகர் செவ்வாய் சந்திரனுடன் இணைவதால் தனது காரமான வாகனத்தை இழந்து சந்திரனின் காரகமான உணவு என்பதை பெற்றுக்கொள்கிறார். இதனால் இங்கு வாகனம் எனும் காரகம் அடிபடுகிறது. உணவு எனும் காரகம் மேலோங்குகிறது. 2 ஆமிட கிரகங்கள் குடும்பத்திற்கு கணினி, மென்பொருள் தொடர்பான வருமானம் வருவதை குறிப்பிடுகின்றன. ஆனால் ஜாதக அமைப்பு சுட்டிக்காட்டும் தொழில்கள் அனைத்திலும் ஒரு ஜாதகர் ஈடுபட வாய்ப்புண்டா? என்பதை தசா-புக்தி கிரகங்களே முடிவு செய்யும் என்று பார்த்தோம்.
ஜாதகி 9 ஆமிடமான மீனத்தில் நீசம் பெற்று நிற்கும் 3, 12 அதிபதி புதன் தசையில் உள்ளார். இதனால் தரகு கமிஷம் ஆகியன தொடர்புடைய தொழில் செய்ய இயலாது என்று பொருளல்ல. புதனின் காரக தொழில் பிரதானமாக இருக்காது என்றே எடுத்துக்கொள்ள வேண்டும். பூமியை நான்காமிடம் குறிப்பிட்டால், நிலத்தை விற்பதை மூன்றாமிடம் குறிப்பிடும். புதன் தசை நடப்பதால் இந்த ஜாதகி நிலத்தரகராக செயல்படுகிறார். பூமி காரகர் செவ்வாய் புதனின் கேட்டையில் நிற்பதும் இதை உறுதி செய்கிறது. செவ்வாயுடன் இணைந்த சந்திரனால் ஜாதகி உணவுத் தொழிலும் செய்கிறார். சந்திரனும் புதனின் கேட்டை நட்சத்திரத்திலேயே நிற்பதால் பல பணியாளர்களை ஒருங்கிணைத்து திருமணம் போன்ற விழாக்களுக்கு Catering தொழிலும் செய்கிறார். 2 ல் அமைந்த சுக்கிரன் ராகு சேர்க்கையால் ஜாதகியின் குடும்பத்தில் மென்பொருள் துறையில் பணியாற்றும் கணவரால் அதன் வகை வருமானமும் வருகிறது.
தசா நாதர் புதன் வலு குன்றியதால் புதனின் தரகு, கமிஷன் தொழில் பிரதானமாக இல்லை. ஆனால் ஆட்சி செவ்வாயால் நீச பங்கப்பட்ட சந்திர வலுவடைவதால் உணவுத் தொழில் சிறப்பாக இருக்கிறது. சந்திரனும் செவ்வாயும் புதனின் சாரத்தில் நிற்பது இணக்கமான பல சமையல் கலைஞர்களை ஒருங்கிணைத்து தொழில் செய்வது சிறப்பான வருமானம் தர காரணமாகிறது. 2 ஆமிட கிரகங்கள் ஜாதகி ஈடுபடும் தொழிலை குறிப்பிடவில்லை குடும்ப உறுப்பினர்களால் வரும் வருமான வகையைத்தான் குறிப்பிடுகின்றன. இவ்வாறான பலவகை வருமான தொழில்களில் ஒருவர் எதில் நீடித்து நிற்க இயலும் என்பதை ஜோதிடத்தில் துல்லியமாக அறியலாம்.
மீண்டும் மற்றுமொரு பதிவில் விரைவில் சந்திப்போம்,
அதுவரை வாழ்த்துக்களுடன்,
ஜோதிஷ ஆச்சார்யா பழனியப்பன்,
கைபேசி: +91 8300124501
